Home
બિઝનેસ
હજુ વધશે પેટ્રોલ-ડીઝલના ભાવ! એક્સપર્ટેના મતે રૂ.3 નો વધારો ઓછો, જાણો કેમ ?

હજુ વધશે પેટ્રોલ-ડીઝલના ભાવ! એક્સપર્ટેના મતે રૂ.3 નો વધારો ઓછો, જાણો કેમ ?

10:23 PM May 15, 2026 Gujju News Channel

આજે પેટ્રોલ અને ડીઝલના ભાવમાં પ્રતિ લિટર 3 રૂપિયાનો વધારો કરવામાં આવ્યો છે. જોકે, નિષ્ણાતોનું માનવું છે કે આ વધારો પૂરતો નથી. પશ્ચિમ એશિયામાં ચાલતા યુદ્ધને કારણે આંતરરાષ્ટ્રીય બજારમાં ક્રૂડ ઓઈલના ભાવ 70 ડોલરથી વધીને 100 ડોલર સુધી પહોંચી ગયા છે.

દેશમાં મોંઘવારીનો માર સહન કરી રહેલી જનતા માટે વધુ એક માઠા સમાચાર સામે આવ્યા છે. લાંબા સમયના વિરામ બાદ આજે શુક્રવારે પેટ્રોલ અને ડીઝલના ભાવમાં પ્રતિ લિટર 3-3 રૂપિયાનો વધારો ઝીંકવામાં આવ્યો છે. પરંતુ આશ્ચર્યની વાત એ છે કે બજારના નિષ્ણાતો આ વધારાને 'નાકાફી' ગણાવી રહ્યા છે અને આગામી દિવસોમાં હજુ પણ ભાવ વધવાની ભીતિ સેવાઈ રહી છે.

► શા માટે હજુ વધી શકે છે ભાવ?

નિષ્ણાતોના મતે, જો પશ્ચિમ એશિયામાં યુદ્ધની સ્થિતિ ચાલુ રહેશે, તો સ્થાનિક સ્તરે પેટ્રોલ અને ડીઝલના ભાવમાં હજુ પણ વધારો કરવો અનિવાર્ય બનશે. કેટલાક એક્સપર્ટ્સનું તો ત્યાં સુધી કહેવું છે કે ઓઈલ માર્કેટિંગ કંપનીઓની ખોટ સરભર કરવા માટે ભાવમાં ઓછામાં ઓછો 15 રૂપિયા સુધીનો વધારો જરૂરી છે.

► 11 અઠવાડિયા સુધી સ્થિર રહ્યા ભાવ

યુદ્ધ શરૂ થયા બાદ આંતરરાષ્ટ્રીય બજારમાં ક્રૂડ ઓઈલ (કાચા તેલ) ના ભાવ 70 ડોલર પ્રતિ બેરલથી વધીને 100 ડોલર સુધી પહોંચી ગયા હતા. આટલા તોતિંગ વધારા છતાં ભારત પેટ્રોલિયમ, હિન્દુસ્તાન પેટ્રોલિયમ અને ઈન્ડિયન ઓઈલ જેવી સરકારી કંપનીઓએ 11 અઠવાડિયા સુધી ભાવમાં કોઈ ફેરફાર કર્યો ન હતો. પરંતુ સતત વધતા દબાણને કારણે અંતે આજે ભાવ વધારો કરવો પડ્યો છે.

► ઓઈલ કંપનીઓની કમાણીમાં મોટું ગાબડું

એક અહેવાલ મુજબ, કાચા તેલના ભાવ વધવા છતાં વેચાણ કિંમત સ્થિર રાખવાને કારણે ઓઈલ માર્કેટિંગ કંપનીઓની કમાણીમાં 90 થી 190 ટકા જેટલો મોટો ઘટાડો નોંધાયો છે. સરકારી કંપનીઓ પહેલા ખાનગી કંપનીઓ જેવી કે નાયરા એનર્જી (માર્ચમાં) અને શેલ ઈન્ડિયા (એપ્રિલમાં) એ પહેલેથી જ ભાવ વધારી દીધા હતા.

► શેરબજાર પર અસર

યુદ્ધની શરૂઆતથી જ નિફ્ટી ઓઈલ એન્ડ ગેસ ઈન્ડેક્સ દબાણ હેઠળ છે. 14 May સુધીના આંકડા મુજબ આ ઈન્ડેક્સ 6.7 ટકા ઘટ્યો છે. કંપનીવાર જોઈએ તો...

• HPCL: 14 ટકાનો ઘટાડો

• BPCL: 23 ટકાનો ઘટાડો

• IOC: 25 ટકાનો ઘટાડો

જ્યારે બીજી તરફ, ઓઈલ ઉત્પાદક કંપનીઓ જેવી કે ONGC અને ઓઈલ ઈન્ડિયાના શેરમાં 7 થી 8 ટકાનો ઉછાળો જોવા મળ્યો છે. આમ, આગામી દિવસોમાં જો વૈશ્વિક સ્થિતિ નહીં સુધરે તો સામાન્ય માણસના વાહન ચલાવવાના ખર્ચમાં હજુ પણ મોટો વધારો થઈ શકે છે.

(નોંધ: આ સમાચાર માત્ર માહિતી માટે છે, રોકાણ કરતા પહેલા નિષ્ણાતોની સલાહ લેવી જરૂરી છે.)