Home
ધાર્મિક અને જ્યોતિષ
ડાકોરના રણછોડરાયના ભક્તો માટે ખુશખબર! મંદિરના શિખર પર ભક્તો હવે જાતે જ ચઢાવી શકાશે ધજા

ડાકોરના રણછોડરાયના ભક્તો માટે ખુશખબર! મંદિરના શિખર પર ભક્તો હવે જાતે જ ચઢાવી શકાશે ધજા

11:06 PM March 18, 2026 Gujju News Channel

ખેડા જિલ્લાના સુપ્રસિદ્ધ યાત્રાધામ ડાકોર ખાતે ભક્તો માટે ખુશીના સમાચાર છે. હવે રણછોડજીના દર્શને આવતા ભક્તો પોતાની ધાર્મિક ભાવના મુજબ ધજા પોતાના હાથે જ ચડાવી શકશે. પરંતુ હવે હજારો ભક્તોની લાગણીને ધ્યાનમાં રાખી આ નવી સુવિધા શરૂ થવા જઈ રહી છે.

ડાકોરથી ભક્તો માટે એક આનંદદાયક સમાચાર સામે આવ્યા છે. ડાકોર રણછોડરાય મંદિર ખાતે હવે ભક્તોને પોતાની જાતે ધજા ચડાવવાની સુવિધા આપવામાં આવશે. આ નવી વ્યવસ્થા અંબાજી મંદિર જેવી રહેશે, જેમાં દોરડા અને ગરગડીની મદદથી ધજા શિખર સુધી પહોંચાડવામાં આવશે.

► સોનાના શિખર ઉપર ચાલી રહ્યું છે કામ

હાલમાં મંદિરના સોનાના શિખર ઉપર આ કામગીરી ચાલી રહી છે. નવી પદ્ધતિ અમલમાં આવ્યા બાદ ભક્તો પોતે જ શ્રદ્ધાપૂર્વક ધજા અર્પણ કરી શકશે, જે અત્યાર સુધી માત્ર મંદિરના કર્મચારીઓ દ્વારા જ કરવામાં આવતી હતી.

► અત્યાર સુધી કર્મચારીઓ ચડાવતા હતા ધજા

આ નિર્ણય હજારો ભક્તોની લાગણીઓને માન આપતા લેવામાં આવ્યો છે. લાંબા સમયથી ભક્તો માંગણી કરતા હતા કે તેમને પણ ધજા ચડાવવાનો મોકો મળે. હવે આ નવી વ્યવસ્થા લાગુ થતા ભક્તોમાં ખુશીની લાગણી જોવા મળી રહી છે.

► હજારો ભક્તોની લાગણીને મળી માન્યતા

મંદિર ટ્રસ્ટ દ્વારા જણાવાયું છે કે આ સુવિધા સુરક્ષાને ધ્યાનમાં રાખીને આધુનિક સાધનો સાથે તૈયાર કરવામાં આવી રહી છે. જેથી ભક્તો સરળતાથી અને સુરક્ષિત રીતે ધજા ચડાવી શકે. આ નવી પહેલથી ડાકોરમાં ભક્તિ અને આસ્થાનો એક નવો અધ્યાય શરૂ થવાનો છે.