Home
બિઝનેસ
સોના-ચાંદીના ભાવ અચાનક ગગડ્યા! મધ્યમ વર્ગ માટે ખરીદીની ‘સુવર્ણ તક’, રોકાણકારોમાં ડરનો માહોલ

સોના-ચાંદીના ભાવ અચાનક ગગડ્યા! મધ્યમ વર્ગ માટે ખરીદીની ‘સુવર્ણ તક’, રોકાણકારોમાં ડરનો માહોલ

08:52 PM June 08, 2026 Gujju News Channel

સોના અને ચાંદીના રોકાણકારો માટે બજારમાંથી એક મોટા સમાચાર સામે આવ્યા છે. વૈશ્વિક દબાણ અને આંતરરાષ્ટ્રીય બજારમાં થયેલા ફેરફારોને કારણે આજે એટલે કે 08 જૂનના રોજ સોમવારે સોના-ચાંદીના ભાવમાં મોટો કડાકો જોવા મળ્યો છે.

Gold Price Down : દિલ્હીના ઝવેરી બજારમાં (સર્રાફા બજાર) સોમવારના રોજ સોના અને ચાંદીના ભાવમાં મોટો કડાકો જોવા મળ્યો હતો. વૈશ્વિક બજારોમાં ઘટાડો, ક્રૂડ ઓઈલની (કચ્છા તેલ) કિંમતોમાં વધારો અને મોંઘવારી અંગે વધતી ચિંતાઓએ સોના-ચાંદી પર જબરદસ્ત દબાણ ઊભું કર્યું છે. સ્થાનિક ઝવેરીઓએ જણાવ્યું હતું કે, આજે 99.9 ટકા શુદ્ધતા ધરાવતા સોનાની કિંમત 1,100 રૂપિયાના ઘટાડા સાથે 1,58,800 રૂપિયા પ્રતિ 10 ગ્રામ પર આવી ગઈ છે. અત્રે ઉલ્લેખનીય છે કે, ગયા અઠવાડિયે શુક્રવારે સોનાનો ભાવ 1,59,900 રૂપિયા પ્રતિ 10 ગ્રામ પર બંધ રહ્યો હતો.

► ચાંદીમાં રૂ.5,000નો ઘટાડો, સોનામાં 1100 ઘટ્યા

સોનાની જેમ જ ચાંદીના ભાવમાં પણ આજે દબાણ જોવા મળ્યું હતું. સોમવારે દિલ્હીના ઝવેરી બજારમાં ચાંદીનો ભાવ 5,000 રૂપિયાના મોટા ઘટાડા સાથે 2,55,700 રૂપિયા પ્રતિ કિલોગ્રામ પર આવી ગયો હતો. ગયા અઠવાડિયે શુક્રવારે ચાંદીનો ભાવ 2,60,700 રૂપિયા પ્રતિ કિલોગ્રામ પર બંધ રહ્યો હતો. નિષ્ણાતોનું કહેવું છે કે, કિંમતી ધાતુઓમાં આ ઘટાડો તાજેતરમાં જોવા મળી રહેલી નબળાઈનો જ એક ભાગ છે. રોકાણકારો હવે સુરક્ષિત રોકાણના બદલે વધતી ઊર્જાની કિંમતોથી મોંઘવારી પર પડનારી અસર પર વધુ ધ્યાન આપી રહ્યા છે.

► વિદેશમાં મોંઘવારી અને વ્યાજ દરોને લઈને ચિંતા વધી

રિસર્ચ એનાલિસ્ટે જણાવ્યું હતું કે, "અમેરિકામાં અપેક્ષા કરતાં વધુ સારા આર્થિક આંકડા આવવાના કારણે મોંઘવારી અને વ્યાજ દરોને લઈને ચિંતા વધી ગઈ છે. આ કારણે સોના અને ચાંદી જેવા સુરક્ષિત રોકાણના વિકલ્પો પ્રત્યેનું આકર્ષણ ઘટ્યું છે." તેમણે ઉમેર્યું હતું કે, પશ્ચિમ એશિયા, ખાસ કરીને ઈઝરાયેલ સાથે જોડાયેલી તાજેતરની ઘટનાઓએ પણ બજારમાં અસ્થિરતા વધારી છે, જેનાથી રોકાણકારોના સેન્ટિમેન્ટ પર અસર પડી છે.

► વૈશ્વિક બજારમાં ક્રૂડ ઓઈલની કિંમત અંદાજે 5 ટકા વધી

આજે આંતરરાષ્ટ્રીય બજારમાં હાજર સોનું (સ્પોટ ગોલ્ડ) અંદાજે 1 ટકા ઘટીને 4,291.79 ડોલર પ્રતિ ઔંસ પર આવી ગયું હતું, જ્યારે ચાંદી 1.34 ટકા ઘટીને 66.93 ડોલર પ્રતિ ઔંસ રહી હતી. આ દરમિયાન, વૈશ્વિક બજારમાં ક્રૂડ ઓઈલની કિંમત અંદાજે 5 ટકા વધીને 97.44 ડોલર પ્રતિ બેરલ પર પહોંચી ગઈ હતી. તજજ્ઞોએ જણાવ્યું હતું કે, "અમેરિકાના મજબૂત રોજગારના આંકડા દર્શાવે છે કે, વ્યાજ દરો હજુ લાંબા સમય સુધી ઊંચા રહી શકે છે. આ ધારણાથી ડોલર મજબૂત થયો છે અને રોકાણ માટે સોના-ચાંદી હવે એટલા આકર્ષક વિકલ્પો રહ્યા નથી."